O SALA TUPE: O LAU ĀIĀ TATAU FAATAGATA-A- NUU MA MEA E TATAU ONA Ā FAIA

Afai e te fia mālamalama atili, pe fia maua se fesoasoani, faamolemole faafesoota‘i ane le Ofisa o Aogā Sala Tupe i se vaega o le Ofisa o Faamasinoga o Itūmālō. E fiafia lava tagata galulue i lenei ofisa e fesoasoani iā te oe.

1. O le totogiina o sala tupe ma nisi taimi faaopoopo e totogiina ai

E tatau ona totogiina le tupe aofa‘i i le aso e faagata ai, lenā o loo tūsia i lau pepa o Faasilasilaga mo Sala Tupe (Notice of Fine).

Afai e te mana‘omia nisi aso faaopoopo e totogi ai lau sala tupe, ia fai sau tusi faatalosaga i se Ofisa o Faamasinoga o Itūmālō ae e le i mae‘a le 28 aso e amata mai i le aso o lou faasalaga. O le 28 aso e faamuta i le aso mulimuli mo le totōgiga (le aso lea e faagata ai) o loo faaalia atu i le faasilasilaga. Afai ua taliaina lau talosaga mo se isi taimi faaopoopo, ma ua ela le totogiina o se isi vaega o le tupe, o le a ē feagai loa ma nisi tulaga faamālosia faale-tulāfono, ma o le a toe faaopoopo se isi tupe totogi i lau sala tupe.

2. O le ā se tulaga e oo iai pe a lē totogia lau sala tupe?

Afai o le a ē lē totōgia lau sala tupe i totonu o le 28 aso sa faasala tupe ai, ma ua lē toe faatagaina atu iā te ‘oe e le Faamasinoga se taimi faaopoopo e totogi ai, o le a faamālosia le tupe totogi o le $100 e faaopoopo i lau sala tupe. O le a faia e le Faamasinoga, ni faatinoga faamālosi, atonu o le a aofia ai:

• le sā‘ia faamālosi (ave ese) sau mea totino (o se faatusa: taavale, T.V., meāfale,) ma faatau atu

• o le ā faamauina se u‘amea loka uili-pa‘u taavale i lau taavale ina ia lē toe mafai ona faa-alu

• o le a faafesoota‘iina le pule o lau galuega, poo le Matāgaluega o Atina‘ega Lautele (Ministry of Social Devolopment) e ave‘eseina le tupe lea e te ‘aitālafu ai mai lou totogi, poo lau penefiti

• o le a tuuina atu i le Ofisa o Leoleo se tusi faale-tulāfono o lou pu‘eina faapagotā

Pe o le ā mana‘omia fo‘i oe e te oo atu i luma o se Tagata Faamasino mo sou faasalaga, poo lou galue i totonu o le a‘ai lautele, poo nisi tulaga, o le faafalepuipui.

E IAI NISI ‘AUALA E MAFAI ONA FAIA E LE OFISA O FAAMASINOGA, (AE E LĒ O TŪSIA ATU), E AO AI SE SALA TUPE.

3. E mafai ona faia o sa‘u tagi tete‘e, se faafofoga‘aga poo se toe faafofoga‘aga?

E mafai ona fai lau tagi tete‘e aga‘i i lou faasalaga, poo soo se poloa‘iga faale-tulāfono ua fai aga‘i iā te oe. Afai e te mana‘o e fai sau tagi tete‘e, e tatau ona tuuina atu sau tusi talosaga e faamatalaina ai le māfua‘aga ua ē lē malie ai i le tonu faai‘u ua faia aga‘i iā te oe. E tatau ona tuuina atu lau tusi talosaga i le Fale Faamasino sa faia ai le tonu faai‘u, i totonu o le 28 aso mai le aso na faasalaina ai oe. Tapa ane i se pepa mai i soo se Fale Faamasino.

E mafai ona ā faatalosagaina se faafofoga‘aga poo se toe faafofoga‘aga pe afai o taualumaga o le faasala tupe o oe, poo le logoina atu o oe mo le sala tupe, sa lē lelei ona faia faataunuu. E mafai ona ā tusi talosaga i se Tagata Faamasino o le Faamasinoga Faale-itūmālō ina ia toe iloiloina soo se poloa‘iga faale-tulāfono, poo se tonu faai‘u sa faia e se Tagata Lesitara e tusa ai ma le faiga faamālosi faaletulāfono o se sala tupe.

4. O le solōia ma le tuulima atu faamālosi o laisene

Afai ua solōia e le Ofisa o Faamasinoga lou laisene, poo ē taumafai fo‘i e sā‘ili se laisene ‘ave taavale, ua tatau loa ona ā vave tuulima atu o lou laisene. E tatau ona:

1. lafoina lou laisene i le ofisa o le Pūlega Saogalēmū o Fanua, Femalagaa‘iga/Fela‘ua‘iga i Ueligitone (Land Transport Safety Authority) PO Box 14-349 Wellington poo le

2. tuuina atu i soo se ofisa o Pūlega Saogalēmū o Fanua, Femalagaa‘iga/Fela‘ua‘iga poo le Ofisa o Faamasinoga poo le

3. tuu ane i se Tagata Leoleo a le Mālō.

Tufatufaina e le Matāgaluega mo Faamasinoga, Niu Sila