Tulafono mo Faamaumauga o Solitulafono (Faamaumauga ua Soloia) 2004

English	English PDF (121KB)	See Also:
Maori	Maori PDF (181KB)	Obtaining a Copy of your Criminal Record,
Cook Island Maori	Cook Island Maori PDF (174KB)
Samoan	Samoan PDF (176KB)
Tongan	Tongan PDF (194KB)
Niuean	Niuean PDF (178KB)

You will need Acrobat Reader to view PDF files. It can be be downloaded for free from the Adobe Website. Adobe also have an online conversion service, to convert PDF documents to HTML for viewing as a web page

O le ā se aogā mo a'u?

O le ā le fuafuaga o lenei tulafono?

O le a aogā ia te oe lenei tulafono o "faamaumauga ua soloia", ina ia faate'a ese ai lou olaga tuai sa iai muamua, e ala i le iai o sau aiā tatau, i nisi o aiaiga, e taofia ai le faailoa atu o faamatalaga e uiga i au solitulafono. Ina ia maua lea aiā tatau, e ao ona e ausia ni tuutuuga e tusa ai o lou talaaga tau solitulafono. Peitai, e lē aofia i lenei tulafono i'uga ma faasalaga i le faamasinoga o tupulaga talavou, ni gaoioiga e solia ai ni maliega po o ni aiā tatau, ma solitulafono e faia i isi atunuu, o lona uiga o le a lē faaaogāina nei solitulafono pe a iloiloina po ua e agavaa mo le tulafono o "faamaumauga ua soloia".

O le Tulafono mo Faamaumauga o Solitulafono (Faamaumauga ua Soloia) 2004 o le a amata faamamaluina mai le aso 29 Novema 2004.

O ā tuutuuga e ao ona ou ausia?

E tatau ona e ausia tuutuuga uma i le vaega 7 o le Tulafono (o loo faailoa atu i lalo se aotelega) a o le'i mafai ona faauiese au solitulafono. E tatau ona mua'i tilofa'ia faamatalaga uma mai le Tulafono.

E tatau:

ona leai ni au solitulafono na faia i totonu o le 7 tausaga faato ā mavae;

ona le'i faasalaina lava oe i se saisaitiaga, e pei o le faafalepuipui, ni a'oa'oga e faasa osa'o ai, o nofoaga o faasalaga;

ona le'i poloa'ia oe e se Faamasinoga, o le a lē lauina se i'uga o sou solitulafono, a e o le a taofia oe i se falema'i ona o se tulaga faalētonu o lou mafaufau;

ona le'i faasalaina oe i se "solitulafono patino" (e pei o solitulafono o amioga faaulugalii e fai i fanauiti ma fanau talavou, po o i latou e lē atoatoa le mafaufau) ;

ona totogi uma ni sala tupe, ni tupe totogi mo ni mea na faaleagaina, po o ni tupe na poloa'ia e le Faamasinoga e totogi ona o se soligatulafono;

ona le'i sē'ia lava lou laisene avetaavale, i se vaitaimi e tusa ai o le vaega 65 o le Tulafono o Femalagaa'iga i le Laueleele 1998, po o nisi tulafono faapena ma ni ona aiaiga muamua atu.

E faapefea ona ou iloa ua ou ausia nei tuutuuga?

O le a faatino lava e le Tulafono le suiga - e lē mana'omia la ona e talosaga mo se "faamaumauga ua soloia".

O le taimi lava e faamalosia ai le tulafono, e mafai loa ona e talosagaina se kopi o faamaumauga o au solitulafono mai le Pule Lagolago o Mataupu Totino a le Matagaluega o Faamasinoga, e iloa ai po o e ausia tuutuuga mana'omia. Afai ua e agavaa i lalo o lenei faatulagaga, o le a soloia loa au solitulafono. Afai o iai pea au solitulafono i ou faamaumauga, o lona uiga e te lē o ausia tuutuuga e agavaa ai.

E mafai ona tuuina atu ia te oe faamatalaga mo lou mauaina o se kopi o faamaumauga o au solitulafono ma se pepa talosaga mai:

( a) le tuātusi i le initineti o le Matagaluega o Faamasinoga www.justice.govt.nz

( e) le fale faamasino i lo outou nuu po o le itumalo; pe

( i) i le tusi atu i le:

The Privacy Assistant
Ministry of Justice
National Office
PO Box 2750
Wellington

E lua ni tulaga e mafai ai e tagata ua lē ausia agavaa mana'omia, ona talosagaina le Faamasinoga ina ia faalēaogā se solitulafono: pe afai o se moliaga mo se sala i se tulafono ua lē o toe faaaogāina e le faamasinoga; pe afai o se faasalaga mo se "solitulafono patino" e lē aafia ai faasalaga saisaitia mo le puipuia o isi. E tatau ona e sa'ilia se fautuaga a se loia pe faamata e mafai ona e talosaga i lalo o nei tulaga.

Ae faapefea pe a toe faasalaina a'u i se isi solitulafono ae ua uma ona ou maua se "faamaumauga ua soloia"?

O le mauaina o se "faamaumauga ua soloia" e fua i le ausia o tuutuuga na ta'ua i luga: afai e te toe solia mulimuli ane na tuutuuga, ona lē toe iai foi lea o sau aiā e maua ai se "faamaumauga ua soloia" se iloga ua toe ausia tuutuuga mana'omia.

Pe o iai ni tulaga o le a i'u ai lava ina faaalia pea a'u solitulafono?

E mafai ona faaalia pea au solitulafono i nisi o taimi (taga'i Vaega 19).

O se faaa'oa'oga o mea e aofia ai:

pe afai o e talosaga mo ni avanoa faigaluega ( e pei o se Leoleo, se tagata faigaluega i le falepuipui po o le nofovaavaaia, avanoa o ni leoleo mo le puipuiga [security ] a le malo, se faamasino, po o se JP) po o ni matafaioi e aofia ai le tausia ma le puipuia o fanau (e pei o se mātuafai)

sa'ili'iliga ma le faia o faamasinoga o nisi foi moliaga; ma

faagasologa o faamasinoga o ni solitulafono po o nisi lava mataupu masani.

I tulaga e mafai ai ona talosaga mo se "galuega", i le pepa talosaga e ao ona ta'ua manino ai le tatau ona faailoa uma solitulafono, e tusa lava po ua e agavaa i lena taimi mo se "faamaumauga ua soloia". I nei tulaga, e tatau ai ona faaalia uma solitulafono i le pepa talosaga, ma afai o le Matagaluega o Faamasinoga po o le ofisa o Leoleo a Niu Sila lea e faailoaina faamaumauga o au solitulafono, o lona uiga la o le a faailoa uma lava faamaumauga o au solitulafono.

E tatau ona e sa'ilia se fautuaga a se loia tuto'atasi pe a iai ni au fesili e faatatau i le iai o se matafaioi patino e fetaui ma le faatagaga a le ofisa o le lesitala.

Pe mafai ona ou natia a'u solitulafono pe a taliina ni pepa faatumu a o o'u faimalaga i isi atunuu pe faatumu ni pepa talosaga mo se visa?

E leai. E lē faaaogāina lau faamaumauga ua soloia a o e feutaga'i ma se atunuu ese pe fesoota'i i se mataupu tau tulafono a se isi atunuu (e pei o le mauaina o se visa, feutaga'iga ma mataupu tau femalagaa'iga ma tiute, ma isi mea faapea) . O le a lafo atu lava i le faautautaga a le atunuu o loo fesiligia, po o le ā se mamafa o le a latou tuuina atu i sau solitulafono ma lona faaaogāina.

E faapefea pe afai ou te mana'o pea i se kopi o a'u solitulafono uma lava ma ia lē natia?

I lalo o aiaiga a le Tulafono o Mataupu Totino 1993, o le a mafai pea ona e talosagaina se kopi o faamatalaga uma ua faamauina e uiga ia te oe e le Matagaluega o Faamasinoga. O le a aofia ai i inei se talosaga tusitusia i le Matagaluega o Faamasinoga.

O a'u o le pule o se galuega. E faapefea i lenei tulafono ona aafia ai ituaiga o fesili e mafai ona ou fesiligia ai se tagata o loo talosaga mo se galuega e ala lea i se faatalanoaga po o se pepa talosaga?

E faatatau le tulafono i galuega ma so o se isi tulaga e fesiligia ai se tagata e faatatau i sona talaaga po o ni faamaumauga o ana solitulafono (e pei o pepa faatumu mo nofoaga totogi, inisiua, ma faamaumauga tau faletupe).

E mafai ai e se tasi o loo ausia agavaa mana'omia ona taliina se fesili e fesiliga ai e faatatau i faamaumauga o ana solitulafono, e ala lea i lona ta'ua faapea o ia e leai ni ana solitulafono faamaumauina

O se solitulafono mo so o se tasi, pe a ia tāpā pe talosagaina e aunoa ma se faatagaga faaletulafono, se tagata e faaali ane faamaumauga o ana solitulafono, pe afai ua iai i lena tagata se aiā faaletulafono e taofia ai na faamatalaga. O le telē e oo i ai le sala o lenei solitulafono, e lē sili atu ma le $10,000.

E faapefea ona ou maua atili nisi faamatalaga?

E mafai ona faatau se kopi o le Tulafono mo Faamaumauga o Solitulafono (Faamaumauga ua Soloia) 2004, mai faletusi o le Bennetts Government Bookshops po o le kopi fua foi mai le tuatusi lenei: www.legislation.govt.nz

O le isi mea e mafai ona fai, o lou sa'ilia o se fautuaga tau tulafono mai sau loia po o le Ofisa Tutotonu o Loia o la outou aai.